Eunateko bi ikaslek Informatikako Olinpiadan parte hartu zuten

12/04/2022

Apirilaren 1ean Eunate institutuko 1. Batxilergoko Ibai Legarra Beroiz eta Aimar Huici Delgado ikasleak Nafarroako Unibertsitate Publikoak antolatutako Informatika Olinpiadetan parte hartu zuten.

Bi modalitate izan ditu aurtengoan Informatika Olinpiadak: programazio modalitatea eta modalitate generikoa, gure ikasleek azken honetan parte hartu zutelarik, Nafarroako beste ikastetxe batzuetako ikasleekin nahasturik.

Hiru froga gainditu behar izan zituzten: lehendabizikoan, bilaketa tresnak menperatzen dituztela erakutsi beharra izan zuten, beharrezko informazioa topatuz egin zizkieten galderak erantzunez. Bigarren frogan, kalkulu orrien erabilera ebaluatu zieten, taula batetik beharrezko informazioa iragaziz eta jasotako galderak erantzunez. Azken eta hirugarren frogan, azkenaldian hain ospetsu bilakatu den Wordle hitz-jokoa programatzea eskatu zitzaien Snap softwarea erabiliz.

Froga hauek binaka egin zituzten eta Ibai eta Aimar beste ikastetxe batzuetako bikoteekin aritu ziren lehian. Nahiz eta ez irabaztea lortu, helburuetara asko gerturatu ziren eta goiz ederra igaro zutela aitortu zuten biek. Zorionak!